Тапталлаах Аммабыт улууһун Үрүҥ Тунах ыһыаҕар, бэс ыйын 21 күнүгэр Күннүк Уурастыырап аатынан киин библиотека «Олоҥхо түһүлгэтин» тэрийдэ. Сыала — соруга : 2024 сылга Аммаҕа Олоҥхо ыһыаҕын бэлэмнэниитин чэрчитинэн 100 киһини олоҥхо тула түмүү. Саха норуотун тылынан уус уран айымньытын сүөгэйэ-сүмэтэ түмүллүбүт олоҥхобутун — духуобунай баайбыт кылаан чыпчаалын, искусствобыт дьоһуннаах айымньытын хас биирдии киһиэхэ тириэрдии, билиһиннэрии буолар.
Бу күн Күннүк Уурастыырап «Тойон Дьаҕарыма» олоҥхотун 44 киһи кыттыылаах күргүөмүнэн ааҕыыта ыытылынна. Улууспут салайааччылара, «Күөгэйээнэ» фольклор ансаамбыла (салайааччы А.И.Артемьева), «Айар абылаҥ» литературнай түмсүү (салайааччы В.И.Стручкова) уонна биирдиилээн дьон 18 сааһыттан үөһэ көхтөөхтүк кыттан олоҥхобутун аахтылар.
Эһиил 2024 сылга Аммабыт дьоно бука бары турунан саха норуотун өйүгэр — сүрэҕэр хаалар гына тэринэн, Т.В.Захаров-Чээбий, Ү.Нохсоороп, Е.Иванова, К.Уурастыырап курдук улуу олоҥхоһуттардаахпытын итэҕэтэн, ыччат дьоҥҥо хаалларар гына үлэлэһэрбитин көрдөрөр кэммит кэллэ.
