Бүгүн о.э. от ыйын 15 күнүгэр «Дьулуур» адаптивнай спорт көрүҥнэригэр ыытыллар өрөспүүбүлүкэтээҕи XIV спартакиада чэрчитинэн «Тренер первых сурдлимпийцев Якутии» диэн документальнай киинэ сүрэхтэниитэ буолла.
Бу документальнай киинэ биһиги биир дойдулаахпытыгар Саха
Өрөспүүбүлүкэтин уонна Россия үтүөлээх тренерэ Федоров Борис Прокопьевич олоҕор, үлэтигэр-хамнаһыгар ананан таҕыста.
Борис Прокопьевич 1953 сыл от ыйын 1 күнүгэр Дьокуускай куоракка төрөөбүтэ. Оҕо сааһа Амма улууһун Покровка сэлиэнньэтигэр ааспыта.
Борис Прокопьевич 1986 сыллаахха мөлтөхтүк истэр оҕолор оскуолаларыгар үлэлии сылдьан, тренердаан саҕалаабыта. 1991 сыллаахха истибэт оҕолор үөрэнэр оскуолаларыгар көспүтэ, манна кини дьоҕура, талаана өссө арыллыбыта. Ол курдук өрөспүүбүлүкэҕэ биллэр саха тустууктарын Эдуард Христофоровы, Прокопий Николаевы, Юрий Копытовы, Сергей Николаевы, Владимир Бородины, Егор Скрябины, уо.д.а. кыра саастарыттан ыла эрчийэн, спорт умсулҕанын иҥэрэн, спорт үрдүкү чыпчаалыгар таһаарбыта.
90-с сыллар уустук кэмнэригэр бэйэтин бэриниилээх, дьаныардаах үлэтинэн, сындылҕаннаах сыратынан доруобуйаларынан хааччахтаах саха тустууктарын Россия, Аан дойду киэҥ түһүлгэлэригэр кытыннарбыт, үрдүкү спортивнай таһымҥа таһаарбыт сүҥкэн өҥөлөөх, тарбахха баттанар уһулуччулаах тренер буолар.
Борис Прокопьевич иитиллээччилэрэ Эдуард Христофоров сахалартан бастакынан мөлтөхтүк истэр спортсменнар ортолоругар көҥүл тустууга РСФСР, СССР чемпиона буолбута. Юрий Копытов, Прокопий Николаев, Владимир Бородин Сурдлимпийскай оонньууларга иккис, үһүс призер буолбуттара. Сергей Николаев саха тустууктарыттан аан бастакынан Сурдлимпиада чемпиона диэн үрдүк ааты ылары ситиһэн, спорт историятыгар киирбитэ.
Улахан уопуттаах тренер, уһуйааччы Борис Прокопьевич хас да көлүөнэ доруобуйаларынан хааччахтаах истибэт спортсменнарга социальнай адаптацияны бараллларыгар, билиниини ылалларыгар, олохторун суолун таба тайаналларыгар көмө-тирэх буолбута. Маны тэҥэ кини остуол тенниһигэр Россия призердарын, «Азия оҕолоро» норуоттар икки ардыларынааҕы спортивнай оонньууларга пауэрлифтинҥа, армспортка призердары иитэн таһаарбыта.
Бу курдук 27 сыл устата тренер Борис Прокопьевич Россия спордун түөрт үтүөлээх маастарын, Сурдлимпиада чемпионун уонна призердарын, истибэт спортсменнар ортолоругар аан дойду, Европа чемпионнарын, Россияҕа көҥүл тустууга тоҕус чемпиону, остуол тенниһигэр Россия күрэҕин кыайылаахтарын иитэн-такайан таһаарбыта.
Борис Прокопьевич – СӨ үөрэҕэриитин туйгуна, СӨ социальнай сулууспатын туйгуна, «Физическэй культураҕа уонна спортка үтүөлэрин иһин» бочуоттаах бэлиэ хаһаайына, икки төгүл «Саха Азия оҕолорун» аан дойдутааҕы оҕо фондатын педогог-стипендиата, Россия уонна СӨ үтүөлээх тренерэ, Россиятааҕы олимпийскай комитет дипломана, «Фэйр-плэй» аан дойдутааҕы дипломана, элбэх грамотанан, махтал суруктарынан наҕарадаламмыта. 2005 сыллаахха СӨ үөрэҕэриитин министерствотын педагогическай энциклопедиятын бочуоттаах кинигэтигэр киирбитэ. Амма улууһун бочуоттаах гражданина буолар.
