Болугур нэһилиэгиттэн төрүттээх биир дойдулаахпыт, тустуунан дьарыгырар спортсмен Георгий Окороков соторутааҕыта Австралияҕа ыытыллыбыт көҥүл тустууга Океания чөмпүйүөнэ буолла. Үтүө сонуну истээт, сиһилии билсээри Георгийы кытары сибээскэ тахса сырыттыбыт.
Георгий кыра эрдэҕиттэн спорт эйгэтигэр сыстыбыта, көҥүл тустуунан дьаныардаахтык дьарыктанар. Кини тустууга аан маҥнай хардыыны оҥороругар күүс-көмө, тирэх уонна онно тапталы иҥэрбит киһитинэн айбыт аҕата Окороков Трофим Трофимович буолар. Ол кини бастакы кылааска үөрэнэр кэмигэр этэ. Георгий араас оскуолаҕа көһө сылдьан үөрэммитэ. Ол курдук, Болугур орто оскуолатыгар 3 -с кылааска диэри үөрэнэн баран, Амма орто оскуолатыгар 6-с кылааска диэри үөрэммитэ. Оттон Мииринэй куоракка биир сыл үөрэнэ бара сылдьыбыта. Уол үрдүкү 7-с уонна 8-с кылаастарга Дьокуускай куорат 31№ оскуолатыгар үөрэммитэ. 2012 сыллаахха Олимпийскай эрэллэр училищеларыгар үөрэххэ киирбитэ. Талааннаах спортсмен уол тиһигин быспакка салгыы сайыннарар баҕаттан билигин Чурапчытааҕы судаарыстыбаннай физическэй култуура уонна спорт үнүстүүтүгэр үөрэнэр. Быйыл үөрэҕин бүтэриэхтээх. Георгий Окороков Арассыыйа да Австралия да таһымыгар ылбыт бастыҥ улахан ситиһиилэрдээх. Ол курдук, 2016 сыллаахха Европа юниордарга күрэхтэһиитигэр Арассыыйаттан кыттан чөмпүйүөннээбитэ. 2022/2023 сс. Австралия чөмпүйүөнүн аатын ылбыта. Оттон быйылгы сылга Океания чөмпүйүөнүн аатын сүгэри ситистэ.
«Хас биирдии спортсмен сүрүн сыалынан Олимпийскай оонньууга кыттыы буолар. Мин эмиэ оннук соруктанан дьаныардаахтык дьарыктанабын, күрэхтэһиилэргэ кыттабын», — диэн Георгий спортсмен сүрүн соругун билиһиннэрэр. Биир дойдулаахпытын үрдүк ситиһиитинэн эҕэрдэлиибит уонна туруоруммут сыалын ситиһэригэр баҕарабыт.
Артем Осипов
