Гаврильев Дмитрий Николаевич — Саха республикатын культуратын үтүөлээх үлэһитэ, документалист — суруйааччы, Российскай Федерация журналистарын союһун чилиэнэ, Таатта улууһун Баайаҕа, итиэннэ Амма улууһун Абаҕа нэһилиэктэрин уонна Амма улууһун бочуоттаах гражданина уонна Бүтүн Россиятааҕы «России верные сыны» диэн конкурс лауреата мэтээллээх.
«Амматааҕы потребительскай общество: 1918-2003 ыллыр» диэн кинигэ «Ааспыт ахтыахха, билиҥҥини билиэххэ» диэн атыы түһүмэҕэр автор Гаврильев Дмитрий Николаевич суруйбут документальнай очеркалара киирдилэр: «Садыков Федор Шакирович (1897-1985)», «Буойун-бухгалтер И.В.Слепцов», «Федоров Михаил Павлович (1907-1993)», «Атыыһыт А.Е,Аргунова», «Никитин Михаил Семенович», «Кылаабынай бухгалтер В.А,Нестеров», «Кооператор Н.А.Ксенофонтов», «Үтүөлээх эргиэн үлэһитэ».
Олоҕун олуктара:
Гаврильев Д.Н. Амма оройуонун Амма-Наахара нэһилиэгин Өнньүөс бөһүөлэгэр 1938 сыллаахха атырдьах ыйын 24 күнүгэр төрөөбүтэ. 1993 сылтан пенсионер.Амма улууһун Амма сэлиэнньэтигэр кэргэттэрин кытары олорор. «Амматааҕы потребительскай общество: 1918-2003 сс.» диэн кинигэ автора Гаврильев Д.Н. 1962 сылтан саҕалаан, Аҕа дойдуну көмүскүүр Улуу сэрии 1941-1945 сылларыгар Саха сириттэн ыҥырыллыбыт буойуннар тустарынан, Саха республикатын уонна киин уобаластар байыаннай архивтарын фондаларыгар харалла сытар докумуоннарга олоҕуран, кинигэлэри суруйда:
«Өйдобүнньүк»: буойуннар ахтыылара, суруктара, өлбүт биллэрилэрэ. – Якутскай: кинигэ изд-вота, 1989.
«Өлбөт өрөгөй»: буойуннар ахтыылара, суруктара, өлбүт биллэрилэрэ. – Якутскай: кинигэ изд-вота, 1990.
«Разведчик Г.М.Андросов»: письма, документы. – Якутск: ЧИФ «Ситим» 1993.
«Албан аат»: буойуннар ахтыылара, суруктара, өлбүт биллэрилэрэ. – Дьокуускай: «Бичик» нац. кинигэ кыһата 1994.
Амма «Өйдөбүнньүк» кинигэтэ: Аҕа дойдуну көмүскүүр улуу сэрии 1941-1945 сылларыгар өлбүттэр биллэрилэрэ уонна эргиллибиттэр испииһэктэрэ. – Дьокуускай: ЧИФ «Ситим» 1995.
«Старший лейтенант Г.М.Андросов» – Дьокуускай: «Бичик» нац. кинигэ кыһата 1995.
Амма улууһун өйдөбүнньүк кинигэтэ: 1941-1945 сс. Аҕа дойду сэриититтэн тыыннаах эргиллибит буойуннар. – Дьокуускай: Бичик 2003.
Маны таһынан, Саха сирин туһунан, 20-с, 30-с уонна 40-с сыллардааҕы кэми кэпсиир «Репрессия уонна реабилитация» диэн 770-тан тахса политическай тутууга – хабыыга түбэспит дьон дьыалаларын туһунан суруйбут кинигэтин «Бичик» кинигэ кыһата 2001 с. бэчээттээбитэ. Документалист суруйааччы Гаврильев Д.Н. үлэ бастыҥнарын уонна тэрилтэ историятыгар сыһыаннаах кинигэлэри эмиэ суруйталаабыта:
«Көмүс көлөһүн» – Дьокуускай: Литограф, 1997.
«Амма» совхоз: 1930-2000 сс. – Дьокуускай Бичик, 2000.
«Үлэ Геройа П.И.Яковлев» – Дьокуускай Бичик, 2001.
«Амматааҕы статистика»: 1921-2001 сс. – Дьокуускай: Агроинформ, 2001.
«Амматааҕы нефтебаза»: 1968-2003 сс. – Дьокуускай: Бичик, 2003.
Тус олоҕо:
Кэргэннии Анна Федосеевна уонна Дмитрий Николаевич Гаврильевтар чөл олохтоох, үлүһүйэр үлэлээх дьиэ кэргэн, дьоһун-мааны ыал аатын ылаллар. Иккиэн «Үлэ ветерана» диэн мэтээллээхтэр, иккиэн үлэлээн ааспыт тэрилтэлэрин «Бочуотун кинигэтигэр» үйэ-саас тухары ааттара суруллубута.
Улахан кыыстара Сардаана Дмитриевна – филологическай наука кандидата, кыра кыыс Мария Дмитриевна – историк уонна юрист. Уоллара Дмитрий – орто үөрэхтээх рабочай. Ыччаттара. Киһи орто туруу дойдуга үөрэҕи, итиэннэ үлэни эрэ үрдүктүк туттаҕына, кини олоҕун илгэтин таһыма үрдүүр.
