Быйылгы 23-с Краеведческай Ааҕыылар Амма улууһугар 2024 сылга Олоҥхо ыһыаҕын көрсө ыытылыннылар уонна Амма олоҥхотугар уонна олоҥхоһуттарыгар ананнылар. Сыалынан-соругунан буолла: — саха омук өркөн өйө, талбан талаана, өрөгөйө түмүллүбүт кылаан чыпчаал, киһи – аймах уһулуччулаах айымньытынан – Олоҥхонон киэн туттуу; -Олоҥхобутун харыстыыр, өрө тутар иэспитин өйдөөн,кини баай, сиэдэрэй тылын көлүөнэттэн көлүөнэҕэ тиэрдии;
Ааҕыыларга 8-11 кылаас үөрэнээччилэрэ уонна 18 сааһыттан үөһэ ким баҕалаах кыттыыны ылла. Уопсайа Амма, Абаҕа, Амма – Наахара, Бөтүн, Болугур, Сатаҕай, Соморсун, Сулҕаччы, Чакыр, Эмис, Мээндиги, Сэргэ-Бэс нэһилиэктэртэн 29 дакылаат киирдэ, мантан 15 оҕолор үлэлэрэ.
Дьүүллүүр сүбэҕэ үлэлээтилэр: Ноговицына Мария Дмитриевна – председатель, ак. Л.В. Киренскэй аатынан лицей саха тылын уонна литературатын учуутала, СР үтүөлээх учуутала, Макарова Светлана Егоровна – Амматааҕы библиотечнай тиһик директорын солбуйааччыта, СР культуратын үтүөлээх үлэһитэ, Кириллина Анна Михайловна – Амма улууһун культураҕа уонна норуот айымньытын салалтатын фольклорга специалиһа, Үөһээ Бүлүү, Өймөкөөн улуустарын Олоҥхо ыһыахтарын хас да төгүллээх Лауреата.
Дьүүллүүр сүбэ кыайыылаахтары маннык быһаарда:
Оҕолорго 1 миэстэни ылла Новгородов Эдуард Антонович, Чакыр орто оскуолатын 9 кылаас үөрэнээччитэ, «Увековечивание имени олонхосута Устина Нохсорова в Амгинском районе» дакылаатынан, сал. Николаева Дария Ефимовна; 2 миэстэ – Дьяконова Надежда, Л.В. Киренскай аатынан Амматааҕы лицей 9 кылаас үөрэнээччитэ, “Потомственный олонхосут Устин Гаврильевич Нохсоров” дакылаатынан, сал. Григорьева Виктория Георгиевна; 3 миэстэ — Попова Вика, П.Караканов аатынан Мээндиги орто оскуолатын 10 кылаас үөрэнээччитэ, “Мин хос эһэм тойуксут Сыалай Маатыс» дакылаатынан, сал. Попова Мария Фомична.
Улахан дьон ортотугар 1 миэстэни ылла Эмис нэһилиэгиттэн Захарова Надежда Константиновна “Эмис түөлбэтин олоҥхоһуттара уонна олоҥхолоро: матырыйааллары хомуйуу, чинчийии уонна бэчээттээһин устуоруйата” дакылаатынан, 2 миэстэ – Амма нэһилиэгиттэн Кириллина Клара Романовна “Айыы далбар кымньыы” дакылаатынан, 3 миэстэ — Сулҕаччы нэһилиэгиттэн Стручкова Раиса Иосифовна “Сулҕаччы түөлбэтин олоҥхоһуттара” дакылаатынан.
Киирбит дакылааттары, презентационнай матырыйааллары дискаҕа түһэрэн электроннай таһаарыы оҥорон бары нэһилиэктэр библиотекаларыгар тарҕатыахпыт.
Кыраайы үөрэтэр Ааҕыыларбытыгар кыттыыны ылбыт Амма улууһун олохтоохторугар махталбытын тиэрдэбит уонна чэгиэн доруобуйаны, уостубат уйгуну, дьолу-соргуну баҕарабыт!
