Муус устар 19 күнүгэр, Бүтүн Россиятааҕы Библионочь акцияҕа кыттыһан, Амматааҕы Күннүк Уурастыырап аатынан киин библиотека ааҕааччыларыгар киэҥ быраграаммалаах тэрээһин ыытта.
Бу күн маастар кылаастар, бэйэни билгэлээһин, Ааҕар дьиэ кэргэн күрэҕэ, оҕолорго квест оонньуу, караокеҕа ыллаан, «Кэрэни көрбүт» киинэни көрөн тарҕастылар. Тэрээһин биир бэлиэ түгэнинэн Чапчылҕан М.М.Григорьев аатынан кулууп дьиэтэ туруорбут Күннүк Уурастыырап «Нуоҕалдьын кугас аттаах Тойон Дьаҕарыма бухатыыр» олоҥхоттон быһа тардыыны сэҥээрэ көрдүбүт.
Бу күн дьиэ кэргэнинэн ааҕар Тимофеевтар, Рязанскаялар, Стручковтар бэлиэтэннилэр уонна дьүүллүүр сүбэҕэ үлэлээтилэр.
Библиотека тиэргэнигэр атыы — тутуу тэрилиннэ.
Ону тэҥэ эдэр натуралистар «Амма чэйин» арааһын амсаттылар, оҕуруот рассаадата, сиэмэ хото атыыланна.
Дедюкиннар дьиэ кэргэттэрэ музыкальнай эҕэрдэлэрин бэлэхтээтилэр.
Кэлбит дьон тэрээһини сэҥээрэн, астынан тарҕастылар.
Сидорова Е.В.
