Бэҕэһээ, ахсынньы 18 күнүгэр библиотекабыт бастыҥ ааҕааччыларын, үлэбитигэр көмө — тирэх буолар дьоммутугар Махтал киэһээтин тэрийдибит

Ол курдук, биһиги бастыҥ ааҕааччыларбытын Михайлова Светлана Михайловнаны, Пестерева Татьяна Ильиничнаны, Неустроева Полина Петровнаны, Скрябина Марта Егоровнаны уонна ыытар тэрээһиннэрбитигэр мэлдьи кыттар «Үрдэл» оҕо общественнай тэрилтэттэн Карамзин Яны, Александрова Анастасияны, Вензель Александраны, Карамзина Кристинаны, Малыкайцев Александры, салайааччыларын Бураева Зинаида Ивановнаны эҕэрдэлээтибит.

Ян Карамзин бэйэтэ суруйбут кэпсээнин «Второй среди Первых» бэлэхтээтэ.

Ыҥырыылаах ыалдьыттарбыт остуол тула олорон, итии чээй иһэ-иһэ ирэ-хоро кэпсэтэн, санааларын атастаһан, сэргэхсийэн, үөрэн, астынан тарҕастылар.

Бу дьоро киэһэбитин СӨ культуратын үтүөлээх үлэһитэ Василий Алексеевич Неустроев баяҥҥа доҕуһуоллан, СӨ үөрэҕириитин туйгуна, педагог — библиотекарь Людмила Романовна Оконешникова ылбаҕай ырыалары бэлэхтээтэ.

Биһиги бу ааһан иһэр сылга ыыппыт үлэбитин, кэлэр сыллааҕы былааммытын билиһиннэрдибит, хардары таабырын таайыстыбыт.

Биэчэр кыттыылаахтарыгар Махтал суруктары, сэмэй бэлэхтэри туттардыбыт. Ыалдьыттарбыт астынан, махтал тылларын этэн тарҕастылар, бу этиллибит тыллар биһигини кынаттыыллар, күүс — көмө буолаллар.   

Ааҕааччыны кытары үлэлиир салаа гл. библиотекара Сидорова Е. В.