Саха сирин уһулуччулаах тустууга, аммалар киэн туттар чулуу уолбут, биир дойдулаахпыт Николай Семенович Захаров — Сахаачча ахсынньы 20 күнүгэр 1948 сыллаахха Аммаҕа төрөөбүтэ

ССРС спордун маастара, Саха АССР, Сибиир уонна Дальнай Восток чемпиона. Эдэрдэргэ ССРС чемпиона. Тыа сирин спортсменнарын ортолоругар ССРС  чемпиона, «Олимпийскай эрэллэр», норуоттар икки ардыларынааҕы турнир чемпиона (Польша, 1967). Студеннар уонна ыччаттар Бүтүн аан дойдутааҕы фестивалларын биир да кыайтарыыта суох иккис призёра. Улахан дьоҥҥо 1969с. ССРС чемпионатыгар кыайтарыыта суох иккис миэстэ. Россия «Урожай» обществотын күрэхтэһиитин чемпиона (Краснодар, 1967), РСФСР тыа сирин тустууктарын чемпионатын кыайыылааҕа (Нальчик, 1967), Казахскай ССР чемпиона (Караганда, 1968), Куба, РСФСР уонна Саха сирэ сүүмэрдэммит хамаандаларын көрсүһүүтүн кыайыылааҕа (Дьокуускай, 1968), Тбилиситээҕи норуоттар икки ардыларынааҕы турнир үрүҥ көмүс призёра (1969) уо.д.а элбэх кыайыылардаах. Николай Захаров ССРС сүүмэрдэммит хамаандатын чилиэнэ этэ.

Сахаачча саха бөҕөстөрүгэр Аан дойду улахан түһүлгэлэрин киэҥ аартыктарын арыйбыт тустууктартан биир чаҕылхайдара буолар. Н.С. Захаров аата Амматааҕы ДЮСШ-ҕа иҥэриллибитэ, кини аатынан уулуссата баар, үгүс өйдөбүнньүк — ытыктабыл турнирдар ыытыллаллар.

Улуустааҕы киин библиотека