В.М.Новиков — Күннүк Уурастыырап аатынан Амматааҕы кииннэммит бибилиэтиэкэ медиа саалатыгар «Үйэлэри уҥуордаан эһиги миигин истиэххит» диэн ааттаах Амма айар куттаах дьонун үйэтитэр бырайыагынан СӨ үөрэҕириитин туйгуна, СӨ бочуоттаах бэтэрээнэ, «Азия оҕолоро» пуонда стипендиата, «Учууталлар учууталлара» бэлиэ хаһаайына, Алтан нэһилиэгин бочуоттаах олохтооҕо Раиса Никифорова «Айыы сирэ — Амма» саҥарар кинигэтэ сүрэхтэннэ.
Амматааҕы кииннэммит бибилэтиэкэҕэ ыытыллыбыт Алтан нэһилиэгин айар куттаах бэтэрээн учуутала Раиса Никифорова «Айыы сирэ — Амма» диэн ааттаах саҥарар кинигэтин сүрэхтэниитин бырайыак ааптара бибилэтиэкэр Вероника Стручкова салайан ыытта.
Үөрүүлээх күн Раиса Исаковна алгыһынан, олоҕун кэпсээнинэн саҕаланна, сахалыы тыыннаах айымньыларын диискэҕэ уһуллубут биир дойдулаахтара, биирдиилээн кыттааччылар ааҕан иһитиннэрдилэр. Эҕэрдэ тылы улуустааҕы култуура салалтатын салайаачыта Иван Иванов, үөрэх салаатын сүрүннүүр исписэлииһэ Күндүүнэ Рожина, киин бибилэтиэкэ дириэктэрэ Евдокия Сутакова,
бырайыак кыттыылаахтара, олохтоох ааптардар Дария Васильева — Амма Даайыс, Наталия Рязанская, Алтана Артемьева,
улуустааҕы саха тылын уонна литературатын учууталларын холбоһуга, Алтан нэһилиэгин дьаһалтатын баһылыгын солбуйааччыта Татьяна Атласова, «Иэйии» култуура киинин уонна бибилэтиэкэ аатыттан Алена Васильева, оскуола аатыттан Анисия Петрова, учуутал уонна төрөппүт Мария Неустроева эҕэрдэлэрин эттилэр.
Айар талааннаах учуутал үөрэнээччилэрэ Уйгулана Ноговицына, Альберт Неустроев ырыаларынан, искусство оскуолатын иитиллээччитэ Радивер Соловьев байааҥҥа оонньоон, искусство оскуолатын иитиллээччитэ Сайаана Егорова
ырыаһыт Василий Неустроевка доҕуһуоллаан, ситэрэн, киэргэтэн биэрдилэр. Учуутал, ааптар айымньылаах үлэтэ сыаналанан «Алтан нэһилиэгин сайдыытыгар кылаатын иһин» бэлиэнэн бэлиэтэннэ.
