«Ким да умнуллубат, туох да умнуллубат» бэлиэ күн К. Уурастыырап аатынан киин библиотекаҕа

Олунньу 19 күнүгэр, К. Уурастыырап аатынан киин библиотекаҕа Ийэ дойдуну көмүскээччилэр уонна Улуу Кыайыы 80 сылын иитинэн Амма нэһилиэгин бэтэрээннэрин сэбиэтэ, үһүс оскуола уонна библиотека кыттыылаах «Ким да умнуллубат, туох да умнуллубат» бэлиэ күнэ тосхойдо. Аҕа көлүөнэ дьоммут Е.П. Борисова, В.И. Яковлев Аҕа дойдуну көмүскүүр 1941-1945 сс. сэриитигэр кыттыбыт убайдарын, кинилэр хорсун быһыыларын туһунан ахтыы кэпсээннэрин оскуола оҕолоро сэҥээрэн иһиттилэр.

Үһүс оскуола көхтөөх аҕа дьоно «Солобуода» эр дьон ансаамбыла «Ыллаатын саллаат ыллаатын», «Федор Попов туһунан ырыа», «Вальс Победы», С. Капитонов «Айхаллыаҕын тыыл саллааттарын» хоһоон толоруулара тэрээһини киэргэттэ. Аҕам саастаах дьоммут ааспыт историяны сэгэтэн, тыыннаахтар умнубат сылларын санатан кэнчээри ыччакка патриотическай тыыны сахтылар.

   Вероника Стручкова