Бастыҥ ааҕар дьиэ кэргэн – 2025
Бастыҥ ааҕар дьиэ кэргэн – 2025
Кулун тутар 14 күнүгэр В.М. Новиков – Күннүк Уурастыырап аатынан Амматааҕы киин библиотекаҕа улуустааҕы “Бастыҥ ааҕар дьиэ кэргэн — 2025” буолан ааста.
Тэрээһин Амматааҕы киин библиотека методическай салаатын көҕүлээһининэн 2004 сылтан ыытыллан үтүө үгэскэ кубулуйан, оҕо иитиитигэр уонна сайдыытыгар дьиэ кэргэнинэн кинигэ ааҕыы оруолун үрдэтэр, ааҕар дьиэ кэргэн үтүө үгэһин пропагандалыыр уонна сайыннарар, дьиэ кэргэни сахалыы уус-уран литератураны уонна суруйааччылар олохторун билиигэ — көрүүгэ көҕүлүүр сыаллаах – соруктаах ыытыллар.
Быйылгы күрэхпит Саха өрөспүүбүлүкэтин култууратын туйгуна, “21 үйэ библиотекэрэ” өрөспүүбүлүкэтээҕи күрэх кыайыылааҕа, “Барҕарыы” фонда стипендиата, култуураҕа улуустааҕы Күннүк Уурастыырап аатынан премия лауреата Розалия Васильевна Илларионова сырдык аатыгар, Улуу Кыайыы 80, Саха суругунан литературатын 125 сылларыгар анаан ыытыллынна.
Күрэххэ улууспут 8 нэһилиэгиттэн 9 дьиэ кэргэн күөн күрэстэстилэр, бу кыттыбыт дьиэ кэргэн нэһилиэк саамай бастыҥ көхтөөх ааҕааччылара, библиотекардар тумус туттар дьиэ кэргэттэрэ буолаллар. Ааҕыыны уонна кинигэни өрө тутар, дьиэ кэргэнинэн ааҕыыны үтүө үгэс оҥостор ыаллар кыттыны ыланнар күрэҕи өссө ордук тыҥааһыннаан биэрдилэр.
Көхтөөх дьиэ кэргэттэр барыта 6 түһүмэххэ тургутууну аастылар:
- «Саха литературатын төрүттээччилэр уонна классик суруйааччылар биллэр айымньылара”
- “Амматтан норуот суруйааччылара”
- “Ырыа тыыннаах хоһоону айар поэттар айымньылара”
- “Дмитрий Николаевич Гаврильев – Саха сирин буойуннарын албан ааттарын үйэтитээччи”
- “Наталия Рязанская – Алампа бириэмийэтин лауреата”
- “Видеобоппуруостар”.
Күрэххэ ситиһиилээхтик кыттан:
- «Бастыҥ ааҕар дьиэ кэргэн — 2025” ааты Чакыр нэһилиэгиттэн Максимовтар дьиэ кэргэн ыллылар
- II миэстэ – Амма-Наахараттан Макаровтар дьиэ кэргэн, III миэстэ – Амма нэһилиэгиттэн Калачевтар дьиэ кэргэн буоллулар
- “Саха классик суруйааччыларын сүгүрүйээччилэрэ» анал аат Эмистэн Кириллиннар дьиэ кэргэттэригэр
- “Билиигэ – көрүүгэ дьулуһар дьиэ кэргэн” анал аат Болугур нэһилиэгиттэн Аммосовтар дьиэ кэргэттэригэр
- «Ааҕыыга көхтөөх дьиэ кэргэн” анал аат Чапчылҕантан Семеновтар дьиэ кэргэттэригэр
- «Элбэҕи эрэннэрэр дьиэ кэргэн” анал аат Амма-Наахараттан Никифоровтар дьиэ кэргэҥҥэ иҥэриллиннэ
- Маны таһынан, Амма улууһун дьаһалтатын ыччат бэлиитикэтигэр уонна социальнай эйгэҕэ управлениетын анал бирииһэ Сатаҕайтан Елисеевтар дьиэ кэргэҥҥэ туттарыллынна
- «Сахамедстар” страховой медицинскэй хампаанньа акционернай уопсастыба Амма улууһугар бэрэстэбиитэлэ анал бирииһин Болугур нэһилиэгиттэн Никифоровтар дьиэ кэргэҥҥэ туттарда
Кыттааччылар бары грамоталарынан уонна сыаналаах бириистэринэн наҕараадаланнылар. Кыайыы өрөгөйүн туппут Максимовтар дьиэ кэргэн Розалия Васильевна Илларионова хаан – уруу аймахтара туруорбут сүрүн бириистэрин ылан үөрдүлэр – көттүлэр.
Күрэскэ кыттыбыт бары дьиэ кэргэттэргэ, кыттааччылары бэлэмнээбит библиотекардарга, спонсордарга тэрийээччилэр ааттарыттан барҕа махталбытын тиэрдэбит. Эһигини кытары өрүү ил-эйэ эҥээрдэстин, доруобай, дьоллоох, кинигэ доҕордоох буолуҥ!
