Үйэ — саас тухары нөрүөн нөргүй…

Муус устар 2 күнүгэр, Амма 1 №-дээх орто оскуолатыгар Улуу Кыайыы 80 сылынан Амма нэһилиэгин бэтэрээннэрин сэбиэтэ, үһүс оскуола, киин библиотека кыттыылаах «Ким да умнуллубат, туох да умнуллубат» дьоһун бэлиэ күнэ тосхойдо.

Аҕа көлүөнэ дьоммут Е.П. Борисова, В.И. Яковлев Аҕа дойдуну көмүскүүр 1941-1945 сс. сэриитигэр сэриилэспит убайдарын, кинилэр хорсун быһыыларын туһунан ахтыыны оскуола оҕолоро сэҥээрэн иһиттилэр.

Үһүс оскуола көхтөөх аҕам саастаах дьоно «Солобуода» эр дьон ансаамбыла «Ыллаатын саллаат ыллаатын», «Федор Попов туһунан ырыа», «Вальс Победы», С.Капитонов «Айхаллыаҕын тыыл саллааттарын» хоһоон толоруулара, Абаҕаттан «Түһүлгэ» ансаамбыл «Тыйыс дьылҕа» үҥкүүтэ тэрээһини олус киэргэттэ. Ааспыт үйэ ыччаттара ол кэми сэгэтэн, тыыннаахтар умнубат сылларын санатан кэнчээри ыччакка патриотическай тыыны сахтылар.

Вероника Стручкова