Борис Федорович Неустроев – МАНДАР УУС 80 сааһа
Саха сирин аатырбыт тимир ууһа, Духуобунас академиятын академига, бөлүһүөк, этнограф, хомусчут 1945 сыллаахха алтынньы 20 күнүгэр Таатта улууүун Баайаҕатыгар күн сирин көрбүтэ. Оскуоланы Мэҥэ Хаҥалас Төҥүлүтүгэр бүтэрбитэ. 1969 сылтан үлэтин саҕалаабыта, бастаан хачыгаарынан онтон физкультура учууталынан үлэлээбитэ. 2005 сылтан Байаҕантай орто оскуолатын директорын солбуйааччытынан, “Мандар» студия салайааччытынан айамньылаахтык үлэлээбитэ.
Б. Ф. Неустроев туоска, таҥаска, маска, тимиргэ ойуулары – оһуордары норуоттан уонунан сылларга бүтүн Саха сирин эт атаҕынан эргийэн, тойон ыҥырыа хонуу сибэккититтэн талан мүөт хомуйарыныы сыралаһан, наардаан – сааһылаан классификация оҥорбута наукаҕа солбуллубат суолталаах. Хас биирдии альбомҥа хантан, кимтэн, хаһан ылыллыбыта суруллан, бэлиэтэнэн киирбитэ бигэ итэҕэллээх уонна махталлаах.
Ойуубут – мандарбыт баайыттан, эгэлгэтэ – эриэккэһэ элбэҕиттэн муҥура суох сөҕөбүт – махтайабыт. Көрбүтүн – билбитин, оҥорбутун сыа – сым курдук ытыспытыгар ылынабыт.
Мандар Уус ойууларыгар саха норуотун олоҕо – дьаһаҕа, олоҕун укулаата дьэҥкэтик көстөр. Сахалар киһини хайдах өрө туталлара, харыстыыллара, удьуорун – утумун салгыырыгар өспөт сүбэлэрэ көҥүллүк көстөллөр. Хас биирдии ойуу – орнамент туһунан СУОЛТАЛААХ, АНАЛЛААХ, дириҥ ис хоһоонноох, саха төрүт культуратын, итэҕэлин дириҥник өйдүөххэ сөп. Олох уопута, итэҕэлбит, өркөн өй ситимнэһэ сылдьаллар.
Борис Федорович саха ойуутун – мандарын дириҥэтэн, кэҥэтэн өй – санаа таһымыгар дабатан таһаарбытын кэрэхсиэххэ эрэ сөп. Бары ойууларыгар былыргыга, үгэстэргэ сыһыана, билэргэ – көрөргө дьулуһуута, ыччакка, кэлэр кэмҥэ кэпсиир баҕата мэҥэ бэлиэ курдук биллэ сылдьар.
Санаатын күүһүн, дьулуурун кыаҕын тарбаҕын талаана харыс да хаадбакка умсугуйа устубута киһини сөхтөрөр, астыннарар.
Норуот маастара Борис Федорович Неустроев – Мандар Уус сахатын норуотун КЭРЭТИН халлаан сулуһунуу тэлгэтэ тэнитэн бар дьонугар көрдөрбүтэ – бараммат махтал тойугунан туоллун!
Ытыктыыр, сүгүрүйэр киһибитигэр, Борис Федоровичка ытык сааһынан ис сүрэхтэн эҕэрдэбитин аныыбыт, чөл туругу, бары үтүөнү баҕарабыт.