Бүгүн, сэтинньи 6 күнүгэр Саха народнай суруйааччыта, Саха Республикатын Духуобунас Академиятын академига, ССРС Суруйааччыларын союһун чилиэнэ, Саха Республикатын культуратын үтүөлээх үлэһитэ, Саха Республикатын Учууталларын учуутала, Амма улууһун Соморсун, Мээндиги, Мэҥэ — Хаҥалас улууһун 1 Тыыллыма, Хаҥалас улууһун Тиит Арыы нэһилиэктэрин, Амма улууһун бочуоттаах гражданина, прозаик, драматург Василий Егорович Васильев – Харысхал төрөөбүтэ 75 сыла
Василий Егорович Васильев – Харысхал, Саха Республикатын Духуобунас Академиятын Академига, 1986 сылтан ССРС Суруйааччыларын союһун чилиэнэ, Саха Республикатын культуратын үтүөлээх үлэһитэ, Россия Суруйааччыларын союһун, АЛРОСА Улахан литературнай бириэмийэтин лауреата, СР Бастакы Президенэ М.Е.Николаев Фондатын бириэмийэтин лауреата, Саха Республиктын Учууталларын учуутала, Амма улууһун Соморсун, Мээндиги, Мэҥэ – Хаҥалас 1 Тыыллыма, Хаҥалас улууһун Тиит Арыы нэһилиэктэрин, Амма улууһун Бочуоттаах гражданина, прозаик, драматург, 1950 сыл сэтинньи 6 күнүгэр Амма улууһун Мээндигитигэр төрөөбүтэ.
1974 сыллаахха Дьокуускайдааҕы государственнай университет саха тылын салаатын бүтэрбитэ. Кини өссө устудьуоннуу сылдьан «Молодежь Якутии» хаһыаты кытта бииргэ үлэлэһэр, уонтан тахса сыл республика бэчээккэ «Кыым» уонна «Саха сирэ» хаһыаттар үлэһитинэн үлэлээбитэ. Араас сылларга ССРС Литфондатын Саха сиринээҕи салаатын директорынан, СӨ айар сойуустарын Управлениетын дириэктэринэн, «Илин» историко-географическай уонна культурологическай сурунаал отделын редакторынан, Олоҥхо Театрын литературнай-драматическай чааһын сэбиэдиссэйинэн, Ассоциацияҕа консультаннарынан үлэлээбитэ.
1976 сылтан литературанан утумнаахтык дьарыктанар. Эдэр суруйааччы инникки кэскиллээҕин народнай поэт Семен Данилов бэлиэтии көрөн сүбэ – ама биэрбит. Кэпсээннэри суруйар, ол эрээри саха литературатыгар драматург быһыытынан киирэр, «Аммаҕа саас этэ” пьесата Саха АССР Культуратын министерствотын бириэмийэтин ылбыта. Харысхал драматургияҕа холонуутун народнай суруйааччы Софрон Данилов үрдүктүк сыаналаабыта.
Революция холоругар ыытыллыбыт, репрессияламмыт, эмиграцияҕа барбыт саха интеллигенциятын историятынан дьарыктанар. Владивосток, Хабаровскай, Красноярскай, Новосибирскай, Москва, Архангельскай, Санкт – Петербург, Петрозаводскай, Соловки, Кытай, Япония, АХШ, Финляндия государственнай, байыаннай архыыптарыгар, библиотекаларыгар үлэлээбитэ. Ол түмүгүнэн “Ааспыт кэм аартыктарынан” диэн документальнай кинигэ 2021 сыллаахха тахсыбыта.
Василий Егорович улахан, доҕордуу ыал баһылыга этэ. Кэргэнинээн Галина Васильевнаны кытта икки оҕону иитэн-үөрэтэн таһаарбыттара, сиэннээхтэр.