Сэтинньи 6 күнүгэр Саха норуотун тапталлаах суруйааччыта, драматург Василий Егорович Васильев — Харысхал 75 сылын бэлиэтиир дьоһун мааны күнүгэр Соморсуҥҥа улуустааҕы «Харысхал ааҕыылара» оскуола оҕолоругар ыытылынна

Барыта 26 оскуола үөрэнээччилэрэ Сэргэ — Бэстэн, Соморсунтан, Мээндигиттэн, Бөтүнтэн, Амматтан кытыннылар. Кыайыылаахтар Лауреат үрдүк аатын сүктүлэр, анал дипломунан, бириистэринэн наҕараадаланнылар.

Өйдөбүнньүк бэлиэ күҥҥэ Бураев В.И. — Амма улууһун (оройоунун) баһылыгын бастакы солбуйааччыта, Колосов В.В. — Улуус депутаттарын мунньаҕын бэрэссэдээтэлэ, Прокопьев П.Е. — Амма улууһун библиотечнай тиһик директора эҕэрдэлэрин эттилэр. Улуустааҕы киин бибилэтиэкэ кылаабынай библиотекара В.И. Стручкова «Үйэлэри уҥуордаан эһиги миигин истиэххит» бырайыагын чэрчитинэн таһаарбыт Харысхалга анаан «Аммаҕа саас этэ» аудио кинигэтин сүрэхтээн билиһиннэрдэ.

Тэрээһин   кыттыылаахтара Мээндигигэ Харысхал пааматынньыгар сибэкки дьөрбөтүн уурдулар. Үтүө киһибит аата сырдыгынан сыдьаайа үйэлэр тухары ахтылла, кэнчээри ыччакка холобур буола турдун.

   Вероника Стручкова