Ахсынньы 16 күнүгэр, Ф. Потапов аатынан култуура киинигэр Гольдерова Саргылана Васильевна — Саргы Куо айар киэһэтэ, өрөгөй үөрүүлээх күнүгэр анаммыт тэрээһинэ буолла

«Айыы саха алгыһа» литературнай түһүмэхтэргэ автор алгыстаах айар үлэтин көрдөрөр ааҕыыларга Болугур хора, Эмистэн «Чэмэлэк» фольклор бөлөҕө, «Күөгэйээнэ» фольклор ансаамбыла, «Дьүөгэлиилэр» вокальнай ансаамбыла, «Айар абылаҥ» литературнай түмсүү, Амма, Болугур орто оскуолаларын үэрэнээччилэрэ уо.д.а. кытыннылар.

Саргы Куо «Саха народнай поэта» үрдүк ааты сүкпүтүнэн дойдутун дьоно-сэргэтэ, аймахтара уруйдаан — айхаллаан эҕэрдэлэрин, үтүө тылларын, алгыстарын анаатылар. Амма улууһун баһылыгын бастакы солбуйааччыта Василий Иванович Бураев Саргы Куоҕа «Амма улууһун бочуоттаах олохтооҕун» бэлиэни туттарда. Айыыһыт алҕаабыт кытылыгар, дьоллоох туонатыгар чахчы да өрөгөй күнэ тосхойдо.

 Вероника Стручкова