Олунньу 11 күнүгэр төрөөбүт төрүт тыл уонна сурук-бичик күнүн чэрчитинэн Күннүк Уурастыырап аатынан Амматааҕы киин библиотека Амма улууһун социальнай эйгэ уонна ыччат бэлиитикэтин салалтатын өйөөһүнүнэн эдэр ыччакка аналлаах «Төрөөбүт төрүт тыл сөрүүн сүөгэй курдук…» диэн ыстаансыйанан оонньуу буолла. Оонньуу сүрүн сыала төрөөбүт тыл сүмэтин, эриэккэһин, кэрэтин ыччакка иҥэрии

Оонньуу 7 ыстаансыйанан ааста:  викторина «Мин ийэ тылым». Манна хамаанда чилиэттэрэ бары кюар-код неҥуе сайтка киирэн толорон, түмүккэ уопсай сөптөөх хоруй баалынан кыайыылаах хамаанда быһаарыллыбыта. «Тэтимнээх ааҕыы» ыстаансыйаҕа 1 мүнүүтэ иһигэр «Sajdьь suola» диэн Николай Егорович Афанасьев 1930 сыллаахха тахсыбыт улахан дьон үөрэтэр букубаардарынан тиэкиһи аахтылар. Билиҥҥи олох тэтиминэн онлайн-пазл “Оҥоро о5ус” ыстаансыйаҕа хамаанда чилиэттэрэ кюар-код неҥуе сайтка киирэн хомуйдулар, түмүккэ уопсай бириэмэ түмүгүнэн кыайыылаах хамаанда тахсан кэлбитэ. Ону таьынан, тургутук “Таабырынна таай”, тылдьыты кытта үлэ “Тыл баар-бараммат баай”, өс хоһоону ситэрэн биэр “Өс хоһооно – өбүгэ номоҕо ” диэн ыстаансыйалар бааллара. Түмүк ыстаансыйа “Соһуччу күрэх”. Манна эрдэ биллэриллибэтэх, этиллибэтэх сорудах буолла. Ол курдук, мүнүүтэ иһигэр ким элбэх хоһуласпыт бүтэй дорҕооннордоох тылы суруйбут хамаанда бу ыстаансыйаҕа кыайыылааҕынан тахсыбыта.

Түмүк быһаарыллар кэмигэр кыттааччыларга «Илии тутуурдаах, өттүк харалаах” диэн открытка уонна бөрүө уруучука оҥоруутугар Наталья Алексеева маастар-кылаас ыыппыта.

Ол курдук, уопсай түмүгүнэн муҥутуур кыайыылаах Федот Потапов аатынан Амматааҕа норуот айымньытын дьиэтин “Уран” хамаандата буолла.  Бэрт кыра баалынан хаалан, II үрдэли «АmgaRun» эко-бырайыак кыргыттара буоллулар. III үрдэли “Сүөгэйдэр” диэн Амма улууһун дьаьалтатын хамаандата ылла.

Киин библиотека краеведческай отдел сэбиэдиссэйэ ийэ тылынан киэн туттун, туттуллар эйгэтин кэҥэтэргэ туруулаһын, үлэлэһин диэн ыҥыран туран хамаандаларга сэмэй бэлэх, сертификат туттарда.

Амма улууһун социальнай эйгэ уонна ыччат бэлиитикэтин салалтатын начальника Неустроева Саргылана Петровна кэнчээри ыччат үүнэн-сайдан тахсарын туһугар ийэ тылын умнуо суохтаах, төрдүтүн-ууһун, төрөөбүт төрүт ийэ тылын билиэхтээх-үөрэтиэхтээх, харыстыахтаах уонна үйэлэртэн-үйэҕэ салҕыы тэнитэ туруохтаах диэн туран эҕэрдэ тыл эттэ уонна муҥутуур кыайыылаах хамаандаҕа 5000 суммалаах КЫЛААН бириис туттарда.