«Когда-нибудь про нас вспомните. И.Я. Строд-человек-легенда. О чем молчали архивы» диэн кинигэ сүрэхтэниитэ

Муус устар 8 күнүгэр, суудаарыстыбаннай куттал суох буолуу уорганнарын бэтэрээнэ, ССРС КГБ сүбэһитэ, РФ сурналыыстарын сойууһун чилиэнэ, Афганистан бойобуой дьайыыларын кыттыылааҕа, энтузиаст — кыраайы үөрэтээччи Калистрат Афанасьевич Кириллин гражданскай сэрии саамай сүрүн бэлиэ түгэннэрин сырдатар, урукку кэмҥэ киэҥ эйгэҕэ тахса илик чахчылары архыып докумуоннарыгар олоҕуран «Когда-нибудь про нас вспомните И.Я. Строд-человек-легенда. О чем молчали архивы» диэн олус интэриэһинэй кинигэ сүрэхтэниитэ Амма улууһун дьаһалтатын аактабай саалатыгар буолан ааста. Кинигэҕэ суруллубут чахчылар бары ФСБ архыыбыттан киирбиттэрэ ордук интэриэһи тардар. Ол курдук урукку өттүгэр гражданскай сэрии туһунан биллэ илик чахчылары мантан ааҕыахха сөп. Кинигэ сүрүн тиэмэтэ И.Я. Строд туһунан буолар, кини суруйааччы быһыытынан арыллыбыта көстөр. Саха норуотугар туох оруоллааҕа сырдаттыллар. Кинигэҕэ Амма солобуодата алта ый устата төгүрүктээһиҥҥэ олорбутун туһунан киэҥник, туспа түһүмэх быһыытынан киирбитэ, биир дойдулаахтарбыт А. Рязанскай, А. Кралин тустарынан материаллар киирбиттэрэ ааҕааччыны кэрэхсэтэр. Ааптар К. Кириллин 15 сыл тухары хасыһан үлэлээбитин түмүгэ бу сүҥкэн суолталаах кинигэ тахсыбыта ааҕааччыга, кыраайы үөрэтээччилиргэ дьоһун бэлэх буолла. Бу күн Анал байыаннай дьайыы кыттыылаахтара, Арассыыйа Дьоруойдара: Александр Гаврильевич Колесов уонна «Алеша» тааҥка экипаһа — Филипп Александрович Евсеев кэлбиттэрэ суолталаах. Тэрээһиҥҥҥэ кэлбит дьон бары астынан, бэрт туһалаах кинигэ тахсыбытын бэлиэтээн тарҕастылар.