Прокопий Иосифович Караканов – Бурдук Буокай төрөөбүтэ 90 сыла
Прокопий Иосифович Караканов – Бурдук Буокай 1936 сыллаахха бэс ыйын 2 күнүгэр Соморсун нэһилиэгэр Мундулаах алааска төрөөбүтэ. Ийэтигэр 19 -с оҕонон, аҕатыгар 21 – с оҕонон күн сирин көрбүтэ. Ийэтэ сэрии ыар сылларыгар хоргуйан өлбүтэ, кырдьаҕас аҕата кыайан иитэр кыаҕа суох буолан, эдьиийэ Анна көрүүтүгэр – харайыытыгар сылдьыбыта. Үөрэнэр кыаҕа суох буолан, оскуолаҕа 10 сааһыгар киирбитэ. Абаҕа детдомугар иитиллибитэ, кэлин Аммаҕа интернатка олорон 9 – с кылааһы бүтэрбэккэ сылдьан, Строд аатынан колхозка сүөһү үлэтигэр биригэдьиири солбуйааччынан үлэлээбитэ. Онус кылааһы киэһээҥҥи оскуолаҕа бүтэрбитэ. Суоппарынан үлэлии сырыттаҕына Строд аатынан колхозка комсомольскай тэрилтэ босхоломмут секретарынан талбыттара.
1965 сыллаахха “Коммунизм тутуутугар” хаһыакка литературнай үлэһитинэн киирбитэ. Советскай партийнай оскуолаҕа үөрэммитэ. 1972 сыллаахха Анаабыр оройуонугар “Кыһыл сулус” хаһыакка ананан барбыта. Үс сыл үлэлээн баран Аммаҕа “Коммунизм тутуутугар” хаһыакка редакторы солбуйааччынан анаммыта. Новосибирскайдааҕы үрдүкү партийнай оскуола журналистика салаатын кэтэхтэн үөрэнэн бүтэрбитэ.
1979 – 1984 сылларга “Коммунизм тутуутугар” хаһыакка редактордаабыта. 1984 сылтан “Кыым” хаһыакка промышленность отделын сэбиэдиссэйинэн, эппиэттээх секретарынан үлэлээбитэ.
1991 сылтан саҥа тэриллибит “Саха сирэ” хаһыат анал корреспондена. Прокопий Иосифович 1989 сыллаахха Емельян Ярославскай аатынан республикатааҕы журналисткай бириэмийэ лауреата, СР культууратын үтүөлээх үлэһитэ, 1994 сыллаахха Республика журналистикатыгар аан бастакынан Государственнай бириэмийэ лауреата, Амма улууһун бочуоттаах гражданина.
Республика журналистикатыгар үлэлээбит 40 – ча сылын устата Саха сиригэр киһи сиир бурдугун чөлүгэр түһэрии, сэрии сылларынааҕы оҕолор үлэлэрин сыаналааһыҥҥа Правительство болҕомтотун тардыыны ситиһии боппуруостарын дьаныһан туран суруйбута. Кини 15 кинигэ редактордара уонна автордара. Сиһилии кини айымньылаах үлэтин туһунан Амматааҕы электроннай библиотекаҕа билсиэххэ сөп: https://amgaelib.ru/?page_id=11092