«Мин аналым – Аммаҕа таптал» улуустааҕы квест – күрэх үрдүк таһымҥа ааста

Бэс ыйын 25 күнүгэр Соморсун нэһилиэгин ыһыахтыыр түһүлгэтигэр Семен Спиридонович Капитонов 75 сааһыгар аналлаах эдэр ыччакка улуустааҕы «Мин аналлым — Аммаҕа таптал» литературнай квест-оонньуу үрдүк таһымнаахтык буолан ааста. Тэрийээччилэринэн Амматааҕы кииннэммит библиотечнай тиһик эдэр библиотекардарын «Биир ситим» түмсүүлэрэ буолаллар.

Күрэххэ 18-45 саастарыгар диэри 5 киһилээх хамаандалар көхтөөхтүк кытыннылар. Оонньуу С.С. Капитонов айар үлэтин, саха литературатын уонна төрөөбүт дойдуга тапталы иҥэрэр, ааҕыыга угуйар сыаллаах-соруктаах ыытылынна. Кыттааччылар 7 түһүмэҕи ааһан, бэйэлэрин билиилэрин, хамаанданан үлэҕэ сатабылларын, айар дьоҕурдарын көрдөрдүлэр.

Уопсайа 7 хамаанада ох курдук оҥостон Амма улууһун: Чапчылҕан, Мээндиги, Эмис, Соморсун, Сулҕаччы уонна Сэргэ Бэс нэһилиэктэриттэн кэлэн оонньуу бэрт сэргэхтик, тыҥааһыннаахтык ааста:

1 түһүмэх «Хатыҥнар сайыны түһүүллэр» — Семен Капитонов хоһооннорун дорҕоонноохтук ааҕыы. Бу түһүмэххэ Сулҕаччы уона Сэргэ Бэс нэһилиэктэриттэн хомуллубут “Ытык көлүйэ” хамаандата баһыйан таҕыста.

2 түһүмэх «Хоһоону сааһылаа» — поэт хоһоонун фрагменнарын сөпкө сааһылаан таһаарыыга тэҥнээҕин Эмис нэһилиэгиттэн “Күннүктэр” хамаанда булбата.

3 түһүмэх «Эдэр сааһым сарыалыгар» — суруйааччы олоҕор уонна айар үлэтигэр сыһыаннаах ыйытыктарга хоруйдааһыны тулуппатылар Соморсун нэһилиэгиттэн “Хоодуоттар” эр дьон хамаандата буоллулар.

4 түһүмэх «Амма чараҥын ахтылҕаннаах ырыаһыта» — суруйааччы хоһоонноругар айыллыбыт ырыалары таайыы. Манна ордук бэлэмнээхтэрин Соморсун нэһилиэгиттэн “Дьулуур” учууталлар хамаандалара көрдөрдүлэр.

5 түһүмэх «Хомуһун тыл кэрэтиттэн…» — хоһоонтон көппүт тыллары ситэрэн биэриигэ Чапчылҕан нэһилиэгэ тэҥнээҕин булбата.

6 түһүмэх «ПАЗЛ таһаарыы» — поэт кинигэтин сирэйин виртуальнай пазлтан таҥыы буолар. Бу түһүмэххэ сымса тарбахтаахтарынан “Ытык көлүйэ” хамаандата бэйэтин көрдөрдө.

7 түһүмэх «Салҕанныҥ эн сырдык аналын» — хамаандалар бэйэлэрин авторскай анабыл хоһооннорун ааҕыыларыгар ордук элбэх баалы ылан “Дьулуур хамаандата” буолла.

Сэттэ түһүмэх түмүгүнэн кыайыылаахтар быһаарылыннылар, бастыҥ хамаандаларга «ДНС» маҕаһыынтан сертификаттар туттарылыннылар:

3 миэстэ – 10 000 солкуобайдаах сертификат – “Күннүктэр» Эмис нэһилиэгэ

2 миэстэ – 15 000 солкуобайдаах сертификат – Чапчылҕан нэһилиэгэ

1 миэстэ – 20 000 солкуобайдаах сертификат “Дьулуур” Соморсун нэһилиэгэ.

Хас биирдии кыттааччыга күрэх туоһу суруга туттарылынна. Тэрээһин кыттыылаахтара уонна көрөөччүлэр сэргэхсийэн, айар куттаах дьоммутугар махтанан тарҕастылар.

Бу курдук, Амма улууһугар литература, айар тыл абылаҥар сүгүрүйүү, эдэр көлүөнэни иитиигэ дьоһуннаах хардыы оҥоһулунна. Тэрээһини иилээн-саҕалаан ыыппыт дьоммутугар уонна көхтөөхтүк кыттыбыт хамаандаларга барыларыгар махтанабыт!