Бэс ыйын 30 күнүгэр, Өрөспүүбүлүкэтээҕи педагогтар дьаарбанкаларын иитинэн Николай, Наталия Рязанскайдар «Удьурҕай Боотур» олоҥхо-остуоруйа кинигэлэрэ бар дьоҥҥо сүрэхтэннэ
Уус уран литератураҕа ураты, сонун айар үлэ күн сирин көрдө. Ол курдук, Россия уонна Саха сирин худуоһунньуктарын сойууһун чилиэнэ, Амма улууһун, Сулҕаччы нэһилиэгин бочуоттаах олохтооҕо Николай Рязанскай бастаан 7 олоҥхо хартыыналарын уруһуйдаабытын балта, прозаик Наталия Рязанская бу хартыыналарынан көрөн олоҥхо киэбинэн оҕолорго аналлаах остуоруйа суруйбут. Кэлин айымньыны ситэрэн өссө эбии биэс хартыына уруһуйданан кинигэ ис хоһооно байытыллан, силигин ситэн бэртээхэй кинигэ күн сирин көрдө. Кэлбит дьон кинигэ тула санааларын сайа эттилэр, ситиһиилэри баҕаран туран саҥа айымньылары күүтэллэрин биллэрдилэр.
Вероника Стручкова
