БЭЛИЭ КҮН
Убаастабыллаах Анна Ксенофонтовнаны – Амматааҕы кииннэммит библиотечнай тиһик Сатаҕайдааҕы библиотекатын библиотекарын, Саха Республикатын культуратын үтүөлээх үлэһитин, Саха Республикатын культуратын туйгунун, Саха Республикатын “Гражданскай килбиэн” анал бэлиэтин туһааннааҕын , Амма улууһа Сатаҕай нэһилиэгин Бочуоттаах олохтооҕун, үлэ бэтэрээнин үбүлүөйдээх төрөөбүт күҥҥүнэн Амматааҕы кииннэммит библиотечнай тиһиккэ бииргэ үлэлиир коллегаларын ааттарыттан итии истиҥник эҕэрдэлиибит!
Анна Ксенофонтовна библиотека эйгэтигэр үлэтин Олом Күөллээҕи библиотекатын тэрийииттэн саҕалаан 1987 сылтан төрөөбүт дойдутугар Сатаҕайдааҕы библиотекатыгар күн бүгүҥҥэ диэри ситиһиилээхтик үлэлии-хамсыы сылдьар.
Анна Ксенофонтовна «Билиҥҥини кытары — ааспыты сэргэ», «Биһиги дьиэнэн ааҕабыт», «Ааттарын ааттыахха» диэн бырайыактар ааптардара.
«Билиҥҥини кытары — ааспыты сэргэ» бырайыагы олоххо киллэрии «Сатаҕай нэһилиэгэ» муниципальнай тэрилтэтин кытта бииргэ ыытыллар. Бырагыраама сыала — түөлбэҕэ бибилэтиэкэ саҥа көрүҥүн үлэлэтии, нэһилиэнньэни култуура сыаннастарыгар уонна чөл олоххо, нэһилиэк уопсастыбаннай уонна муниципальнай тэрилтэлэрин өйөбүллэринэн угуйуу. Бу бырайыак чэрчитинэн 2007 с. бибилэтиэкэ саҥа дьиэтэ тутуллубута, олохтоох кыраайы үөрэтээччилэр кинигэлэрэ бэчээттэммитэ: С. Яковлев «Тимир көлөнү тэһииннээбиттэрэ» (2009 с.), А. Артемьев, И. Адамов «Дьоруой төлкөтө түстэммит түөлбэтэ» (2009 с.), «Тимофей Спиридонович Лукин» (2014 с.). 2023 сылга Г.Н. Шишигина «Сатаҕай нэһилиэгин төрүччүтэ», А.К. Андреева хомуйан оҥорбут «Ыраас таптал төлкөлөөх олох» диэн кинигэлэрин билиһиннэриилэрэ уонна Сатагай нэһилиэгиттэн төрүттээх худуоһунньук Дмитрий Адамов «Киистэ кистэлэҥнээх эйгэтигэр» диэн быыстапката ыытыллыбыттара. 2025 сылга бу бырайыак иһинэн А.К. Андреева хомуйан оҥорбут «Семен Данилович Давыдов» диэн кинигэтин билиһиннэрии буолла. Бу кинигэ «Ими гордится Якутия» сиэрийэнэн таҕыста. С.Д. Давыдов уһун кэмҥэ «Сатаҕай нэһилиэгэ» тыа сирин тэрилтэ баһылыгынан үлэлээбитэ.
Анна Ксенофонтовна идэтигэр үрдүк таһымнаах хаачыстыбаларын сэргэ, дьоҕурун таһынан улахан тэрийэр талааннаах.
Кини салалтатынан бибилэтиэкэ иһинэн маннык кулууптар, түмсүүлэр үлэлииллэр:
— «Мин — бибилэтиэкэ-волонтеробун» орто сүһүөх кылаас оҕолоругар аналлаах;
— «Алаһа» дьиэ кэргэнинэн ааҕар кулууп;
— «Саһарҕа» үрдүкү кылаас үөрэнээччилэригэр анаммыт мөккүөрдээх (дискуссионнай) кулууп;
— «Аартык» олохтоох ааптардар литературнай холбоһуктара.
Андреева Анна Ксенофонтовна нэһилиэк уопсастыбаннай олоҕор көхтөөхтүк кыттар. «Дьүрүһүй» диэн дьахталлар вокальнай ансаамбылларын салайааччытынан үлэлиир. 2022 сылга норуодунай ансаамбыл 30 сыллаах үбүлүөйүн бэлиэтээбитэ. Үбүлүөйдээх айар киэһэ чэрчитинэн Анна Ксенофонтовна хомуйан оҥорбут «Ырыа абылаҥар куустаран» диэн кинигэ-альбомун билиһиннэрбиттэрэ. Кинигэҕэ ансаамбыл кыттыылаахтарын, сыана бэтэрээннэрин ахтыылара, хаартыскалар киирбиттэр.
Анна Ксенофонтовна Сатагай сэлиэнньэтин Бэтэрээннэрин сэбиэтин бэрэссэдээтэлинэн ситиһиилээхтик үлэлиир. Сылларынан араас кэмнэргэ Анна Ксенофонтовна нэһилиэк Сэбиэтин дьокутаатынан талылла сылдьыбыта, Дьокутааттар сэбиэттэрин бэрэссэдээтэлин солбуйааччынан үлэлээбитэ.
Ытыктабыллаах коллегабыт Анна Ксенофонтовна!
Эйиигин кэрэ-бэлиэ күҥҥүнэн — үбүлүөйгүнэн итиитик-истиҥник эҕэрдэлиибит! Эн биһиги тэрилтэбитигэр киллэрэр кылаатыҥ сүҥкэн улахан. Эйигин үлэҕэр бэриниилээх, эппиэтинэстээх, уопуттаах исписэлиис быһыытынан бары ытыктыыбыт, холобур оҥостобут. Куруук сонун санаалардааххын, саҥа бырайыактары олоххо киллэрэргэ көхтөөххүн. Үлэҕэр өссө үрдүк ситиһиилэри, кэскиллээх былааннарыҥ туолалларыгар, чэгиэн доруобуйаны, дьиэ кэргэҥҥэр иллээх-эйэлээх олоҕу баҕарабыт! Саха норуотун бастыҥ алгыһынан:
Уруй-туску! Айхал-мичил!