Саха АССР культуратын үтүөлээх үлэһитэ Неустроев Илья Михайлович — Ырыа Ылдьаа төрөөбүтэ 100 сыла

Илья Михайлович 1926 сыллаахха атырдьах ыйын 17 күнүгэр Амма улууһун Алтан нэһилиэгин Буор Көрдүгэн диэн сиригэр төрөөбүтэ. 6 кылааһы бүтэрбитэ.

Норуот айымньытын маастара, мелодист, поэт, персональнай быыстапкалара Ленинградка (1975), Нерюнгрига (1979), Дьокуускайга (1981) турбуттара. Кини оҥорбут норуот инструмена — кырыымпа — Ленинград история уонна этнография музейыгар, Новосибирскайдааҕы Глинка аатынан консерваторияҕа, Улан‑Удэ куоракка музыка инструменттарын музейыгар хараллан сыталлар. Кини барыта 33 кырыымпаны, 50 сэргэни оҥорбута. Москваҕа студеннар фестивальларын (1957), Ленинградка Саха сирин норуот маастардарын быыстапкатын (1988) кыттыылааҕа.

Хоһооннорун 1953 сылтан саҕалаан таһаарар буолбута, 4 хоһоон сборниктара күн сирин көрбүттэрэ: «Ахтылҕан уйатын дойдута» (1952), «Хоһооммун кырыымпа тыллаатым» (1992), «Кэрэҕэ кыттыстым» (1996), «Сүрэхтэн тахсыбыт хоһооннор» (2001). Кини барыта 300‑тэн тахса хоһоон суруйбута, сорох хоһооннорун мелодияларга киллэрбиттэр.

А. Романов «Орто дойду» киинэтигэр уһуллубута. 1999 сылга С. Н. Сантаев режиссердаах 45 мүнүүтэлээх «Кэрэҕэ кыттыстым» документальнай киинэ И. М. Неустроев олоҕун уонна айымньыларын туһунан оҥоһуллубута.

Музыковед‑учуонай Галина Алексеева уонна Франция этномузыкана Анри Леконт 40 мүнүүтэлээх саха олонхоһуттарын тустарынан оҥоһуллан тахсыбыт  компакт дискаҕа Илья Михайлович Неустроев бэйэтин кырыымпатыгар «Ньургун Боотур» олоҥхону вариациялаан уһуллан тахсыбыта (1992).

1992 сылтан Саха сирин суруйаачыларын союһун чилиэнэ. Кини айымньыларын бу сиигэнэн киирэн билсиэххитин сөп: https://amgaelib.ru/?page_id=21960