Аммаҕа «Кэрэхсэбиллээх чахчылар» кинигэ ааптара Масаха Мэхээс ыалдьыттаата

Алтынньы 10 күнүгэр Аммаҕа бэрт сэргэх тэрээһин буолан ааста, ол курдук биһиэхэ бүгүн Мэҥэ Хаҥалас улууһун сэбиэтин дьокутаата, уопсастыбынньык, урбаанньыт, ыал аҕата, «Кэрэхсэбиллээх чахчылар» кинигэ ааптара Масаха Михаил Иванович — Масаха Мэхээс ыалдьыттаата. Амматааҕы библиотечнай тиһик директора Прокопьев П. Е. ыалдьыппыт туһунан кылгастык билиһиннэрэн баран тылы Мэхээскэ биэрдэ. Эдэр киһи тыла — өһө ылбаҕайа, киһиэхэ тиийимтиэ гына кэпсиирэ, бэйэтин билиитин дьоҥҥо тиэрдэрэ истибит эрэ киһини сэҥээртэ. Истиҥ кэпсэтии буолла, дьон ыйытыктарыгар толору хоруйу ыллылар, саха сиэринэн эдэр ыччаппытыгар ис сүрэхтэн тахсар баҕа санаалар этилиннилэр. Масаха Мэхээс кинигэтэ хайдах күн сирин көрбүтүн, туох санааттан суруйбутун туһунан уонна былааннарын иһитиннэрдэ. Тэрээһин түмүгэр үгүс ааҕааччы ааптартан кинигэлэригэр илии баттатан ыллылар, уопсай хаартыскаҕа түһүү буолла. Масаха Мэхээс курдук эдэр ыччат элбииригэр баҕара хааллыбыт, кэс тылбытын тиэртибит.

Амматааҕы киин библиотека ааҕааччыны кытары үлэлиир салаа сэбиэдиссэйэ Сидорова Е.В.