Библиотекаҕа бэлэх
Бүгүн Аммаҕа Илиҥ Эҥэр улуустар икки ардыларыгар дуобакка күрэхтэһии буола турар. Манна үгүс күрэхтэһээччилэр, тэрийээччилэр кэлэн кыттыыны ыла сылдьаллар, олор истэригэр Аан дойду дуобакка күрэхтэһиитин чемпиона, Аан дойду ветераннарга күрэхтэһиитин 4 төгүллээх призера, Европа күрэхтэһиитин призера, Международнай категориялаах дуобат арбитра, ФМЖД маастара Дмитрий Васильевич Сыромятников. Кини олоҕун, төрүттэрин, дьиэ кэргэнин туһунан саҥа тахсыбыт “Кэрэ киһи Кэрэһиннээх Дмитрий Васильевич Сыромятников” бэртээхэй хомуурунньугу Амма библиотекатыгар бэлэхтээн үөртэ.
Итини сэргэ Россия үтүөлээх экэнэмииһэ, СӨ норуотун хаһаайыстыбатын үтүөлээх үлэһитэ, экэниэмэкэ, инвестиция, үп-хонтуруол эйгэтигэр үтүөлэрин иһин Исидор Барахов аатынан судаарыстыбаннай бириэмийэ лауреата, Гражданскай килбиэн бэлиэ хаһаайына, Аан дойду, Азия, Саха сирэ дуобакка федерацияларын салайбыт, 30 сыл устата дуобаты сайыннарыыга сүрүн үлэтин тас өттүнэн үлэлээбит, ордук Саха сиригэр дуобат сайдыытыгар үтүөлээх Владимир Ильич Птицын “Дуобатчыттардыын алтыспыт дьоллоохпун” кинигэтин элбэх ахсаанынан бэлэх уунна.
Бу биһиги библиотекабыт краеведческай фондатын спорт туһунан кинигэ хаҥааһыныгар үтүө холобур буолар. Владимир Ильич Птицыҥҥа, Дмитрий Васильевич Сыромятниковка улахан Махталбытын тиэрдэбит!
