«Үрүҥ торуоска» дэкээдэ сүрүн сыалынан-соругунан харахтарынан көрбөт уонна мөлтөхтүк көрөр дьоҥҥо уопсастыба болҕомтотун тардыы уонна тулуурдаах сыһыаны олохтооһун, инникигэ эрэли үөскэтии буолар. Ол курдук, «Үрүҥ торуоска» дэкээдэ чэрчитинэн сэтинньи 8 күнүгэр улуустааҕы киин библиотекаҕа «Хаһан? Ханна? Хайдах?» диэн ааттаммыт улуустар икки ардыларынааҕы интеллектуальнай онлайн-викторина ыытылынна. Викторинаҕа Мэҥэ Хаҥалас улууһуттан харахтарынан көрбөттөр уопсастыбаларын чилиэннэрэ Василий Алексеев, Виктория Христофорова уонна Игорь Захаров кыттыыны ыллылар. Амма улууһуттан Таисия Александрова, Олег Сидоров, Александра Устинова кытыннылар. Оонньуу саҕаланыан иннинэ хамаандалар бэйэлэрин билиһиннэрдилэр. Мэҥэ Хаҥалас «Мэҥэбил», Аммалар «Сардаана» диэн ааттаннылар. Викторина 2 түһүмэҕинэн ыытыллан, түмүккэ Мэҥэ Хаҥалас «Мэҥэбил» хамаанда бастаата, Амма «Сардаана» хамаандата иккис миэстэ буоллулар. Хамаандаларга диплом уонна сертификат туттарылынна.
