Ахсынньы 14 күнүгэр Албан ааттаах Абаҕа нэһилиэгин Устин Нохсоороп аатынан духуобунас киинигэр үөрүүлээх кэрэ бэлиэ күн тосхойдо. Ол курдук айар куттаах, эргиччи талааннаах кэргэннии Прокопий Васильевич Карманов, Татьяна Филипповна Антонова «Амма Абаҕатын алгыһынан айабыт» диэн аудио (саҥарар) кинигэлэрэ күн сирин көрдө, дьонноругар сэргэлэригэр сүрэхтэннэ. Бу кинигэ Күннүк Уурастыырап аатынан киин библиотекатын кыраайы үөрэтэр салаа кылаабынай библиотекара Вероника Стручкова «Үйэлэри уҥуордаан эһиги миигин истиэххит» диэн бырайыагынан 17-с уочараттаах таһаарыы буолар. Кинигэҕэ автордар кэпсээннэрэ, хоһоонноро, ырыалар, анабыл айымньылара киирдилэр. Татьяна Филипповна ылбаҕай ырыаларын толордулар Екатерина Яковлева, Абаҕатааҕы врачебнай амбулатория коллектива. Хоһооннору истиҥник аахтылар Евгения Попова, Юлия Яковлева, кэпсээннэри Прокопий Карманов, Мотрена Порядина. Эҕэрдэ маанытын эттилэр нэһилиэк баһылыга М.И. Тимофеев, оскуола директора Л.К. Александрова, Е.С. Яковлева, П.Н. Еримеева, аймахтара, үөлээннээхтэрэ, ыкса ыаллара.
Кармановтар дьиэ кэргэн бэйэлэрин ураты тыыннаах, талааннаах тарбахтарынан оҥорбут айар быыстапкалара турда. Кэлбит дьон биһирэбилин ылла.
Манна улахан көмөнү Абаҕатааҕы К.Туйаарыскай аатынан библиотека үлэһиттэрэ Клара Афанасьевна Карманова, Юлия Аркадьевна Яковлева сүүрэн көтөн, кыһаллан тэрийдилэр.
Кинигэ биһирэмин ыытта В.И. Стручкова
