Эмискэ библиотека 1953 сыллаахха тэриллибитэ. 2023 сылга тэриллибитэ 70 сыла буолар. Бастакы библиотекарынан Винокуров Прокопий Илларионович, онтон отут сыл Захарова Октябрина Дмитриевна, библиотека бэтэрээнэ, 1989 — 2016сс. — сүрүнүүр библиотекарь Уварова Маргарита Гаврильевна, Саха Республикатын култууратын туйгуна, үлэ бэтэрээнэ.
Маргарита Гаврильевна эргэ кулууп көтүрүллүөҕүттэн араас сиргэ үлэлээбит эбит, хонтуора кыараҕас хоһугар, эргэ музей дьиэтигэр, эмиэ да култуура киинин кыараҕас хоһугар, ханна-ханна олордон үлэлэппэтэхтэрэй?! Ол тухары барытын бэйэтин харчытынан өрөмүөннээн, кимнээҕэр тупсаҕай гына оҥорон иһэрэ, ааҕааччылары библиотека дьиэтигэр угуйа сылдьара. Онтон 2014 сыл аам-даам тымныы сатыылаан турар кэмигэр саҥа кулууп сыбаайатын түһэрии үөрүүлээх чааһа үрдүк үөрүүгэ, дьон сүргэтэ көтөҕүллэн ыраахтан, чугастан дьон тоҕуоруһа мустан ааспыта. Баһылык Илья Пестерев олохтоохтортон санааларын истэн баран, тутуубут үйэлээх буоллун диэн таас тутууга көспүтэ. Маргарита Гаврильевна эһиил киирэр курдук сананан үөрүүтэ үрдүк халлааҥҥа этэ.
Эбийиэк Үтүө дьыала чэрчитинэн тутулунна. Онтон бу ахсынньы ый 16 күнүгэр, тымныыны аахсыбакка Эмис нэһилиэгэр бастакы таас тутуу – элбэх хайысхалаах култуура киинэ үлэҕэ киирэр үөрүүлээх күнэ буолла. Олохтоохтор бука бары түмсэн бу бэлиэ күнү уруйдаатылар, ыраахтан-чугастан ыалдьыттар тоҕуорустулар. Эбийиэк аһылларын туоһулуур аалай лиэнтэ быһылынна, алгыс сиэрэ-туома ыытыллынна, эҕэрдэ тыллар биир-биир этиллэн, мустубут дьон ытыс таһыныылара сэлээбэккэ тыаһаата. СӨ Култуураҕа уонна духуобунай сайдыыга миниистирин бастакы солбуйааччыта Афанасий Ноев, улууспут баһылыга Степан Кузьмин, нэһилиэк баһылыга Прокопий Бубякин эҕэрдэ тылларын эттилэр, эбийиэк тутуутугар үлэлээбит, көмөлөспүт дьоннорго наҕараадалары туттардылар.
Саҥа дьиэҕэ олохтоох дьаһалта, кулууп, библиотека, почта киирдилэр. Тутуу сырдык, үрдүк, онон саҥалыы үлэлииргэ былаан элбэх.
Үөрүүлээх күн киин библиотечнай тиһик дириэктэрин солбуйааччы Светлана Макарова, профсоюз председателэ Туйаара Новикова олохтоох библиотекаҕа эҕэрдэ суруктарын, харчынан бэлэхтэрин туттардылар. Дьокуускайтан биир дойдулаахтарбыт Андрей Захаров, Василий Захаров, Анастасия Захарова Саха сирин искусствотын диэйэтэлэ Лира Львовна кинигэлэрин бэлэхтээтилэр. Онно эбии “Көлүкэчээн”, “Далбар Хотуннар” ансаамбыллар стеллаж бэлэх ууннулар. Улахан коллективпар барҕа махталбын тиэрдэбин. Онтон библиотека доҕотторо Андрей Захаров, Анастасия Захарова, “Көлүкэчээн”, “Далбар Хотуннар” ансамбылы кытта сибээспитин быспаппыт, бииргэ үлэлэһэбит.
Түмүккэ, саҥа дьиэҕэ сэтинньи ый бүтэһигин диэки эргэ библиотекабытыгар махтанан баран көһөн кэлбиппит. Көһөрбүтүгэр оскуола оҕолоро, “Кэрэли” үҥкүү бөлөҕө, нэһилиэк эр дьоно бары саба түһэн көспүппүт. Онтон библиотекабыт көстүүтэ тупсаҕай буоларыгар библиотечнай тиһик директорын солбуйааччыта Светлана Егоровна салалтатынан Туйара Иннокентьевна Новикова, Татьяна Афанасьевна Сутакова, Владилена Васильевна Неустроева, худуоһунньук Дмитрий Афанасьевич Бубякин буолан бары саба түһэн бэрээдэктииргэ көмө-тирэх буолбуттара олус махталлаах суол. Сүрүн сыалбыт граҥҥа киирсэргэ сыал-сорук турар.
Дьэ, ити курдук саҥа библиотека саҥалыы тыыннаах үлэтин салгыыр.
Прасковья Бубякина
