Олунньу 18 күнүгэр Үлэ Геройа, Саха республикатын норуотун хаһаайыстыбатын үтүөлээх үлэһитэ, Саха АССР депутатынан үс төгүл талыллыбыт, Амма улууһун бочуоттаах олохтооҕо, Амма 20-с үйэтин чулуу киһитэ, буойун, учуутал, аатырбыт ыанньыксыт Петр Ионович Яковлев 100 сылынан төрөөбүт күнүн көрсө ЗУУМ платформа нөҥүө «Дьуонабыс кыргыттара» диэн төгүрүк остуол буолла. Кыттыыны ыллылар Амма Наахара нэһилиэгин баһылыга Мария Романовна Захарова, 1972-1975 сылларга «Юбилейнай «ыччат комсомольскай фермаҕа үлэлээбит, оччотооҕу кэмҥэ эдэркээн, эрчимнээх Дьуонабыс кыргыттара, билигин элэккэй эйэҕэс эбээлэр Мария Евсеевна Петрова, Галина Ивановна Васильева, Аграфена Евсеевна Архипова, Зинаида Николаевна Николаева, Ольга Романовна Николаева. Бу сыллар Петр Ионович үлэтигэр саамай үрдүк көрдөрүүнү ситиспит сыллара буолаллар. Дьуонабыс кыргыттара ааспыт кэми,наставниктарын истиҥ иһирэх тылларынан кэпсээн, ахтан санаан аастылар. Нэһилиэк баһылыга бу үбүлүөйдээх Үлэ Геройун сылыгар ыытыллар тэрээһиннэри, үйэтитиини сиһилии сырдатта. ЗУУМу салайан ыытта Күннүк Уурастыырап аатынан Киин библиотека кыраайы үөрэтэр салаатын сүрүн библиотекара Вероника Ивановна Стручкова
