Кулун тутар 17 күнүгэр Күннүк Уурастыырап аатынан улуустааҕы киин библиотекаҕа Амма улууһугар дьиэ кэргэн экономикатын сылыгар аналлаах «Дьиэ кэргэҥҥэ уйгуну быйаҥы, өлгөм аһы» диэн Зуум площадка нөҥүө кэпсэтии ыытылынна.
Кыттыыны ыллылар Сатаҕайтан хонуу курупааскытын иитэр фермер Айтал Неустроев, Промкомбинаттан опыттаах оҕуруотчут Матрена Никитина, Сулҕаччыттан сибэкки, оҕуруот олордор Степанида Никитина, Амматтан эдэр натуралистар станцияларын производственнай үөрэхтээһин маастара, сэдэх идэлээх тыа инженера Александра Киренская.
Дьиэ кэргэн экономикатын бөҕөргөтөр, сайыннарар, эбии дохуоттанар кэскиллээх үлэ барар тосхоллорун туһунан кэпсэтии барда. Эдэр фермер Айтал Неустроев ылсыбыт хонуу курупааскытын көрүү, элбэтии, түргэнник ситэр салаа барыстааҕын сэҥээрдилэр, биһирээтилэр.
Тэрээһини иилээн саҕалаан ыытта кыраайы үөрэтэр салаа сүрүн библиотекара Вероника Стручкова.
