Кулун тутар 24 күнүгэр Амматааҕы киин библиотекаҕа Саха сирин бастакы комсомолецтарыттан биирдэстэрэ, Гражданскай сэрии актыыбынай кыттыылааҕа, ССРС суруйааччыларын союһун чилиэнэ, Саха АССР үтүөлээх учуутала, Саха АССР искусствотын үтүөлээх деятэлэ, драматург Ефремов Степан Павлович олоҕун, үлэтин кэрэһэлиир альбом сүрэхтэниитэ бэрт сэргэхтик буолан ааста

Тэрээһиммит күндү ыалдьыттарынан С.П. Ефремов улахан уола СР үтүөлээх тутааччыта, Хаҥалас улууһун бочуоттаах олохтооҕо, «Первостроитель Якутии» бэлиэ хаһаайына Ефремов Виктор Степанович; альбому хомуйан оҥорбут, СР культуратын, СР анал үөрэхтээһинин туйгуннара, Хаҥалас улууһун Бочуоттаах олохтооҕо, күтүөтэ Дьяконов Афанасий Николаевич буоллулар.

Улуус баһылыгын маҥнайгы солбуйааччы Бураев В.И. эҕэрдэ тылын этэн туран Махтал суругун Афанасий Николаевичка туттарда.

Ыалдьыттарбыт аҕаларын туһунан элбэҕи кэпсээтилэр, олус интэриэһинэй чахчылары иһитиннэрдилэр, элбэх киһи С. Ефремовы драматург эрэ быһыытынан билэр эбиппит диэн бэлиэтээтилэр, гражданскай сэриигэ биллэр оруолу ылбытын үгүстэр саҥа иһиттилэр.

Тэрээһиҥҥэ Амма народнай театр артыыстара кыттыыны ыллылар, эйэлэрин санаалар атастастылар.

Иһирэх эҕэрдэ тылы Амматааҕы архив сэбиэдиссэйэ Катерина Окорокова эттэ.

Библиотека ааҕааччыта Барашкова М.А. бэрт элбэх боппуруостарыгар эппиэти ылан астынна.

Тэрээһини иилээн- саҕалаан ыытта Амматааҕы киин библиотека кылаабынай библиотекара Стручкова Вероника Ивановна.

Тэрээһини тэрийдэ ааҕааччыны кытары салаа кылаабынай библиотекара Сидорова Елизавета Владимировна.

Гражданскай сэрии историятын уонна драматург С.П. Ефремов айар үлэтин, айымньыларын  кэпсиир киэҥ ис хоһоонноох кинигэ быыстапката турда.

Тэрээһиҥҥэ сылдьыбыт ыалдьыттарбыт, кыттыыны ылбыт Амма олохтоохторо астынан, махтанан тарҕастылар.

Сидорова Е. В.