Муус устар 23 күнүгэр Бүтүн Россиятааҕы Библионочь ааксыйа чэрчитинэн Күннүк Уурастыырап аатынан киин библиотекаҕа олохтоох ааптар, «Айар абылаҥ» литературнай түмсүү чилиэнэ Наталия Рязанская «Аммаҕа төрүүллэр дьоллоохтор», «Сэттэ сурук», саҥа кинигэлэрэ уонна «Үйэлэри уҥуордаан эһиги миигин истиэххит» диэн Вероника Стручкова бырайыагынан 14-с «Аммаҕа төрүүллэр дьоллоохтор» Наталия Рязанская электроннай диискэтин (аудио кинигэ) сүрэхтэниитин дьоро күнэ буолла.
Кыттыыны ыллылар куораттан саха тылын учуутала, «Сэттэ сурук» айымньы геройа Лена Романова, Нам Хомустааҕыттан суруйааччы, поэт Алексей Татаринов-Удьурҕай, Мэҥэ Хаҥалас Чүүйэтиттэн Наталия бииргэ студеннаабыт дьүөгэтэ Варвара Порядина,
Уус Алдантан эҕэрдэтин ыытта Иннокентий Попов — Оҕуруоттаах, Амматтан лицей директора Дария Захарова, учуутал коллегата Мария Ноговицына, улуустааҕы үөрэх управлениетыттан дьүөгэлэрэ Анна Попова, Мотрена Малыкайцева уонна Наталья Бубякина -Амма олоҕо хаһыат редактора.
Айар абылаҥ түмсүү чилиэннэрэ Амма Даайыс, Марфа Харитонова, Светлана Михайлова, биир дойдулааҕа Дмитрий Феофанов Н.Рязанская хоһоонун аахтылар, лицей учууталлара «Поликлиникаҕа» диэн автор саҥа сценкатын көрдөрдүлэр, Наталия хоһоонноругар ырыалары толордулар.
